స్వగ్రామంలో విజయ్ దేవరకొండ దంపతులకు ఘన స్వాగతం

నాగర్‌కర్నూల్ జిల్లా బల్మూరు మండలం తుమ్మన్‌పేట గ్రామంలో సోమవారం అరుదైన ఆనంద క్షణాలు ఆవిషృ్కతమయ్యాయి. నూతన దంపతులు విజయ్ దేవరకొండ, రష్మిక మందన తమ స్వగ్రామాన్ని సందర్శించడంతో గ్రామమంతా పండుగ వాతావరణంలో మునిగింది. గ్రామ ప్రవేశ ద్వారం వద్ద తెల్లవారుజామున నుంచే అభిమానులు, గ్రామస్తులు భారీగా గుమిగూడి పూలమాలలు, హర్షధ్వానాలు, తాళపత్రాలతో స్వాగత ఏర్పాట్లు చేశారు. డప్పు వాయిద్యాలు, కోలాటాల నృత్యాల మధ్య జంటకు అట్టహాసంగా ఆహ్వానం పలికారు. చిన్నారుల నుంచి వృద్ధుల వరకు ప్రతి ఒక్కరూ తమ గ్రామానికి గర్వకారణమైన విజయ్‌ను, ఆయన సతీమణి రష్మికను ఒక్కసారి చూడాలని ఆసక్తిగా తరలివచ్చారు. యువతీ యువకులు మొబైల్ ఫోన్లలో ఫోటోలు, వీడియోలు తీసుకుంటూ ఆనందాన్ని పంచుకున్నారు. మహిళలు మంగళహారతులు పట్టి సాంప్రదాయబద్ధంగా ఆహ్వానించారు. గ్రామ వీధులు రంగవల్లులతో అలంకరించి పూలతోరణాలతో శోభాయమానంగా కనిపించాయి. ఉదయం 11:15 గంటలకు నూతన దంపతులు వేదమంత్రాల మధ్య తులసిమాతకు ప్రత్యేక పూజలు నిర్వహించారు.

అనంతరం సత్యనారాయణ వ్రతంలో పాల్గొని కుటుంబ సభ్యులతో కలిసి ఆశీర్వాదాలు పొందారు. ఈ కార్యక్రమానికి కుటుంబ సభ్యులు, అచ్చంపేట నియోజకవర్గంలోని వివిధ రాజకీయ పార్టీల ముఖ్యులు, స్థానిక ప్రజాప్రతినిధులు, గ్రామ పెద్దలు పెద్ద సంఖ్యలో హాజరయ్యారు. గ్రామ దేవాలయంలో ప్రత్యేక ప్రార్థనలు నిర్వహించి గ్రామాభివృద్ధి, ప్రజల శ్రేయస్సు కోసం ఆకాంక్షించారు. తన వివాహం అనంతరం తొలిసారి సతీమణితో కలిసి స్వగ్రామానికి చేరుకున్న విజయ్‌కు చిన్ననాటి స్నేహితులు హృదయపూర్వక స్వాగతం పలికారు. పాత జ్ఞాపకాలను గుర్తుచేసుకుంటూ గ్రామ వీధుల్లో కాసేపు సంచరించారు. తెలంగాణలోని మారుమూల గ్రామంలో జన్మించిన విజయ్ స్వశక్తితో సినీ రంగంలో ఎదిగి దేశవ్యాప్తంగా గుర్తింపు పొందడం గ్రామస్తులకు గర్వకారణమైంది. ఆయన ప్రయాణం యువతకు స్ఫూర్తిగా నిలుస్తుందని పలువురు అభిప్రాయపడ్డారు. సినిమా రంగం వారిని కలిపిందని అభిమానులు భావిస్తారు. అభిమానులు ప్రేమగా పిలిచే ‘విరోష్’ అనే పేరునే తమ వివాహ వేడుకకు ప్రతీకగా నిలిపి అభిమానులకు ప్రాధాన్యం ఇచ్చిన ఈ జంట, దేశవ్యాప్తంగా పలు నగరాల్లో స్వీట్లు పంపిణీ చేసి అభిమానుల ఆశీర్వాదాలు పొందిన విషయం తెలిసిందే. ఇప్పుడు వివాహానంతరం స్వగ్రామ సందర్శనతో గ్రామంలో ఉత్సాహం మరింత పెరిగింది. తుమ్మన్‌పేట గ్రామం సోమవారం ఆహ్లాదభరిత దృశ్యాలతో కళకళలాడింది. సాంప్రదాయ సంగీతం, సంబరాలు, హర్షధ్వానాల మధ్య గ్రామం మొత్తం ఒక మహోత్సవ వాతావరణాన్ని సృష్టించింది.