దోసకాయ, వెల్లుల్లి నిల్వ పద్ధతులు
చాలామంది దోసకాయలను చల్లగా తినడానికి ఇష్టపడి ఫ్రిజ్లో ఉంచుతారు. అయితే 10°C కంటే తక్కువ ఉష్ణోగ్రతలో ఇవి 2-3 రోజులు ఉంటే పసుపు రంగులోకి మారి పాడైపోతాయి. ముఖ్యంగా వీటిని టమోటాలు లేదా పుచ్చకాయలతో కలిపి ఉంచితే, వాటి నుండి వెలువడే ఇథిలీన్ వాయువు వల్ల దోసకాయలు త్వరగా మెత్తబడతాయి. ఇక వెల్లుల్లి విషయానికి వస్తే, ఫ్రిజ్లోని తేమ వల్ల ఇది త్వరగా మొలకెత్తి, తన ఘాటైన రుచిని ఔషధ గుణాలను కోల్పోతుంది. వెల్లుల్లిని ఎప్పుడూ గాలి ఆడే పొడి ప్రదేశంలో ఉంచడమే ఉత్తమం.
ఉల్లిపాయలు, టమోటాల విషయంలో జాగ్రత్తలు
ఉల్లిపాయలను ఫ్రిజ్లో ఉంచడం వల్ల వాటిలోని పిండిపదార్థం చక్కెరగా మారి, అవి మెత్తగా లేదా ముద్దగా తయారవుతాయి. తేమ వల్ల ఇవి త్వరగా కుళ్ళిపోయే ప్రమాదం కూడా ఉంది. చీకటిగా, గాలి ప్రసరించే చోట ఉంచితే ఇవి నెలల తరబడి తాజాగా ఉంటాయి. అదేవిధంగా, టమోటాలను ఫ్రిజ్లో పెడితే వాటి అంతర్గత నిర్మాణం దెబ్బతిని చప్పగా మారిపోతాయి. టమోటాల అసలైన రుచి సువాసన కావాలంటే వాటిని గది ఉష్ణోగ్రత వద్దే ఉంచాలి.
బంగాళదుంపలు..
బంగాళదుంపలను ఫ్రిజ్లో ఉంచడం వల్ల అందులోని పిండిపదార్థం చక్కెరగా మారుతుంది. ఇటువంటి బంగాళదుంపలను అధిక వేడి మీద వేయించినప్పుడు ‘అక్రిలమైడ్’ (Acrylamide) అనే హానికరమైన రసాయనం ఉత్పత్తి అయ్యే ప్రమాదం ఉంది. ఇది ఆరోగ్యానికి ఏమాత్రం మంచిది కాదు. అందుకే బంగాళదుంపలను ఎప్పుడూ చీకటిగా, పొడిగా ఉండే ప్రదేశంలోనే నిల్వ చేయాలి. కేవలం వండిన తర్వాత మిగిలిన కూరను మాత్రమే చల్లార్చి ఫ్రిజ్లో ఉంచుకోవాలి. ప్రతి కూరగాయకు ఒక నిర్దిష్ట నిల్వ పద్ధతి ఉంటుంది. ఫ్రిజ్పై అతిగా ఆధారపడకుండా, ఏవి బయట ఉంచాలో తెలుసుకోవడం వల్ల ఆహార వృథాను అరికట్టవచ్చు ఆరోగ్యాన్ని కాపాడుకోవచ్చు.