బరువు తగ్గడం అనేది చాలామందికి ఒక కలగానే మిగిలిపోతుంది. ఒక్క కిలో తగ్గడానికి కూడా వారాలు, నెలలు పడుతుండటంతో చాలామంది మధ్యలోనే ప్రయత్నాన్ని విరమిస్తుంటారు. అయితే సరైన శాస్త్రీయ పద్ధతులను పాటిస్తే వారానికి 2 కిలోల బరువు తగ్గడం సాధ్యమేనని ఫిట్నెస్ నిపుణులు చెబుతున్నారు. దీనికోసం కేవలం ఆహారం మానేయడం కాకుండా శరీరానికి అవసరమైన పోషకాలను అందిస్తూ కేలరీలను ఖర్చు చేయడంపై దృష్టి పెట్టాలి. ముందుగా బరువు తగ్గడానికి, కొవ్వు తగ్గడానికి మధ్య ఉన్న తేడాను గుర్తించాలి. మనం వారానికి గరిష్టంగా 500 గ్రాముల స్వచ్ఛమైన కొవ్వును మాత్రమే కరిగించగలము. మిగిలిన బరువు తగ్గుదల అనేది శరీరంలోని నీరు లేదా కండరాల ద్వారా జరుగుతుంది. కాబట్టి కండరాలు బలహీనపడకుండా కేవలం అనవసరమైన కొవ్వును మాత్రమే కరిగించడం అసలైన ఫిట్నెస్ అని ది హెల్త్ సైట్ నివేదిక స్పష్టం చేస్తోంది.
కేలరీల నిర్వహణే బరువు తగ్గుదలలో కీలక పాత్ర పోషిస్తుంది. మీరు వారానికి 2 కిలోలు తగ్గాలనుకుంటే, ప్రతిరోజూ మీరు తీసుకునే ఆహారం కంటే 250 నుండి 500 కేలరీలు అదనంగా ఖర్చు చేయాలి. మనం తీసుకునే ఆహారంలో శక్తి ఎక్కువగా ఉండి, శారీరక శ్రమ తక్కువగా ఉన్నప్పుడు.. ఆ అదనపు శక్తి చర్మం కింద కొవ్వుగా పేరుకుపోతుంది. క్రమం తప్పకుండా కేలరీలను ఖర్చు చేయడం వల్ల ఈ నిల్వ ఉన్న కొవ్వు కరగడం ప్రారంభమవుతుంది. బరువు తగ్గే క్రమంలో ప్రోటీన్ తీసుకోవడం చాలా ముఖ్యం. ఇది కొవ్వును తగ్గిస్తూనే కండరాలను కాపాడుతుంది. నిపుణుల సలహా ప్రకారం.. మీ శరీర బరువులో ప్రతి కిలోకు 1 నుండి 1.5 గ్రాముల ప్రోటీన్ తీసుకోవాలి. ప్రోటీన్ ఎక్కువగా ఉండే ఆహారం తీసుకోవడం వల్ల కడుపు ఎక్కువసేపు నిండుగా ఉన్న అనుభూతిని కలిగిస్తుంది. దీనివల్ల అనవసరమైన చిరుతిండ్లు తినాలనే కోరిక తగ్గి, కేలరీల నియంత్రణ సులభమవుతుంది.
వ్యాయామం విషయానికి వస్తే.. కేవలం నడక లేదా సాధారణ వ్యాయామాలు సరిపోవు. వారానికి కనీసం 4 నుండి 5 గంటల పాటు శక్తి శిక్షణ లేదా వెయిట్ లిఫ్టింగ్ చేయడం అవసరం. ఇది శరీరంలోని మొండి కొవ్వును కరిగించి, ఆకృతిని మెరుగుపరచడంలో సహాయపడుతుంది. అంతేకాకుండా ఈ శిక్షణ వల్ల ఎముకలు బలపడతాయి మరియు మెటబాలిజం రేటు పెరిగి, విశ్రాంతి సమయంలో కూడా శరీరం కేలరీలను ఖర్చు చేసేలా చేస్తుంది.
కాగా వారానికి 2 కిలోలు తగ్గడం అనేది మీ క్రమశిక్షణ, పట్టుదలపై ఆధారపడి ఉంటుంది. సరైన మోతాదులో ప్రోటీన్ తీసుకుంటూ, రోజువారీ కేలరీల లెక్కను గమనిస్తూ, క్రమం తప్పకుండా వ్యాయామం చేస్తే ఆశించిన ఫలితాలను ఖచ్చితంగా పొందవచ్చు. బరువు తగ్గడం అంటే ఆకలితో ఉండటం కాదు, ఆరోగ్యకరమైన జీవనశైలిని అలవర్చుకోవడమే అని గుర్తించాలి.
(గమనిక: ఈ కథనంలో అందించిన సమాచారం కేవలం మీ అవగాహన కోసం వివిధ ఆరోగ్య నివేదికల ఆధారంగా ఇవ్వడం జరిగింది. ప్రతి ఒక్కరి శరీరతత్వం వేర్వేరుగా ఉంటుంది.. కాబట్టి ఏదైనా కొత్త డైట్ ప్రారంభించే ముందు తప్పనిసరిగా వైద్యుల సలహా తీసుకోవడం శ్రేయస్కరం.)