Devdutt Padikkal Centuries: భారత్లో ప్రస్తుతం దేశవాళీ క్రికెట్ సీజన్ జోరుగా సాగుతోంది. సయ్యద్ ముస్తాక్ అలీ ట్రోఫీ ఇటీవల ముగియగా, ఇప్పుడు వన్డే ఫార్మాట్ అయిన విజయ్ హజారే ట్రోఫీ జరుగుతోంది. ఈ టోర్నమెంట్లో భారత దిగ్గజ బ్యాటర్లు ఆడుతుండటంతో మైదానంలో సెంచరీల వర్షం కురుస్తోంది. ఈ సీజన్లో ఇప్పటికే చాలా మంది ఆటగాళ్లు 4 కంటే ఎక్కువ సెంచరీలు సాధించారు. కర్ణాటకకు చెందిన దేవదత్ పడిక్కల్ (Devdutt Padikkal) ఐదు మ్యాచ్ల్లో నాలుగు సెంచరీలు బాదగా, ఇతర ఆటగాళ్లు కూడా తమ ఓపెనింగ్ మ్యాచ్ల్లోనే సెంచరీలు చేసి అదరగొడుతున్నారు. బీహార్కు చెందిన యువ సంచలనం వైభవ్ సూర్యవంశీ కూడా ఈ టోర్నీలో సెంచరీ సాధించాడు.
దేవదత్ పడిక్కల్ పేరిట 13 సెంచరీలు..
కర్ణాటక స్టార్ బ్యాటర్ దేవదత్ పడిక్కల్ విజయ్ హజారే ట్రోఫీలో నిలకడగా రాణిస్తున్నాడు. ఈ సీజన్లో ఆడిన మొదటి ఐదు మ్యాచ్ల్లోనే నాలుగు సెంచరీలు బాదాడు. రాజస్థాన్తో జరిగిన ఆరో మ్యాచ్లో పడిక్కల్ 82 బంతుల్లో 91 పరుగులు చేసి సెలక్టర్లకు సవాల్ విసిరాడు. అంతకుముందు త్రిపురతో జరిగిన మ్యాచ్లో 120 బంతుల్లో 108 పరుగుల అద్భుత ఇన్నింగ్స్ ఆడి కర్ణాటక 80 పరుగుల తేడాతో గెలవడంలో కీలక పాత్ర పోషించాడు.
25 ఏళ్ల పడిక్కల్ లిస్ట్-ఏ క్రికెట్లో తన 13వ సెంచరీని పూర్తి చేశాడు. విశేషమేమిటంటే, ఆయన ఈ ఘనతను కేవలం 38 ఇన్నింగ్స్ల్లోనే సాధించాడు. ఇది ఒక అసాధారణ రికార్డు. 6 అడుగుల 3 అంగుళాల పొడవు ఉండే ఈ ఎడమచేతి వాటం బ్యాటర్ కేరళలోని ఎడప్పల్లో జన్మించాడు. 11 ఏళ్ల వయస్సులో క్రికెట్ ఆడటం ప్రారంభించిన ఆయన, ఈ స్థాయికి చేరుకోవడానికి ఎంతో కృషి చేశాడు.
ఈ సీజన్లో నాలుగు అద్భుత సెంచరీలు..
పడిక్కల్ ఈ ఏడాది విజయ్ హజారే ట్రోఫీలో ఇప్పటివరకు సాధించిన సెంచరీల వివరాలు ఇలా ఉన్నాయి:
జార్ఖండ్పై: 147 పరుగులు
కేరళపై: 124 పరుగులు (137 బంతుల్లో)
పుదుచ్చేరిపై: 113 పరుగులు
త్రిపురపై: 108 పరుగులు
తమిళనాడుపై జరిగిన మ్యాచ్లో 22 పరుగులకే అవుట్ అయినప్పటికీ, ఆ చిన్న ఇన్నింగ్స్లోనూ తన దూకుడును ప్రదర్శించాడు. రాజస్థాన్పై జరిగిన ఆరో మ్యాచ్లో సెంచరీకి చేరువయ్యాడు. కానీ, 91 పరుగుల వద్ద మానవ్ సుతార్ బౌలింగ్లో బౌల్డ్ అయ్యాడు. ప్రస్తుతం న్యూజిలాండ్ సిరీస్కు ఆయన ఎంపిక కాకపోయినప్పటికీ, 2027 వన్డే ప్రపంచ కప్కు టీమిండియాలో ప్రధాన పోటీదారుగా అవతరించాడు.
దేవదత్ పడిక్కల్ లిస్ట్-ఏ కెరీర్..
లిస్ట్-ఏ క్రికెట్ చరిత్రలో పడిక్కల్ తన బ్యాటింగ్తో నిజమైన ప్రకంపనలు సృష్టిస్తున్నాడు. ఇప్పటివరకు తన కెరీర్లో కేవలం 38 ఇన్నింగ్స్ల్లోనే 83 సగటుతో 2676 పరుగులు చేసి అందరినీ ఆశ్చర్యపరిచాడు. ఈ అద్భుతమైన ప్రయాణంలో పడిక్కల్ మొత్తం 13 సెంచరీలు, 13 అర్ధసెంచరీలు సాధించారు. ఆయన అత్యుత్తమ స్కోరు 152 పరుగులు.
“పోరాటం ఎంత పెద్దదైతే, విజయం అంత అద్భుతంగా ఉంటుంది” అనే మాట పడిక్కల్కు సరిగ్గా సరిపోతుంది. తన దూకుడు, నిలకడైన బ్యాటింగ్ శైలితో ఆధునిక క్రికెట్లో ఓపెనర్ నిర్వచనాన్ని ఆయన మారుస్తున్నాడు.
మరిన్ని క్రీడా వార్తల కోసం ఇక్కడ క్లిక్ చేయండి..