కాచిగూడ, వెలుగు: స్టూడెంట్ల అకౌంట్లలోనే ఫీజు రీయింబర్స్మెంట్ జమ చేయాలని జారీ చేసిన జీవో నంబర్ 7ను వెంటనే ఉపసంహరించుకోవాలని రాజ్యసభ సభ్యుడు ఆర్.కృష్ణయ్య డిమాండ్ చేశారు. తెలంగాణ విద్యార్థి సంఘం అధ్యక్షుడు పగిళ్ల సతీశ్ ఆధ్వర్యంలో కాచిగూడలో ఏర్పాటు చేసిన సమావేశంలో ఆయన పాల్గొన్నారు. ఈ సందర్భంగా మాట్లాడుతూ.. కాలేజీ యాజమాన్యాలు ఫీజులను ముందుగానే చెల్లిస్తేనే అడ్మిషన్లు ఇస్తామని చెప్పడం సరికాదన్నారు. కోర్టు సైతం ఫీజులను విద్యార్థుల నుంచే వసూలు చేసుకోవచ్చని ఆదేశాలు ఇవ్వడం బాధాకరమని, ఈ అంశాన్ని పార్లమెంట్లో ప్రస్తావిస్తానని చెప్పారు.
సింగిల్ బెంచ్ కోర్టు ఇచ్చిన తీర్పుపై ప్రభుత్వం హైకోర్టు ఫుల్ బెంచ్కు అప్పీల్ చేయాలని సూచించారు. అంతవరకు ప్రస్తుత జీవోను నిలిపివేసి పాత పద్ధతిలోనే ఫీజు రీయింబర్స్మెంట్ కొనసాగించాలని ప్రభుత్వాన్ని కోరారు. ఈ సమావేశంలో బీసీ సంఘ నాయకులు నీల వెంకటేశ్, రాజేందర్, అనంతయ్య, అంజి గౌడ్, చంద్రశేఖర్ గౌడ్, శివ కుమార్ యాదవ్, మల్లేశ్, అశోక్ తదితరులు పాల్గొన్నారు.
గ్రీన్ చానల్ విధానంలో చెల్లించాలి..
మెహిదీపట్నం: జీవో నంబర్ 7ను సవరించి గ్రీన్ చానల్ విధానంలో విద్యార్థుల ఫీజు బకాయిలను చెల్లించాలని తెలంగాణ విద్యార్థి జేఏసీ చైర్మన్ వేముల రామకృష్ణ కోరారు. శుక్రవారం మెహిదీపట్నంలో స్టూడెంట్స్తో కలిసి ర్యాలీ నిర్వహించి నల్ల కండువాలతో నిరసన తెలిపారు. అనంతరం జీవో కాపీలను చించేశారు. స్పష్టత లేని జీవో 7 వల్ల పేద విద్యార్థులు ఉన్నత విద్యకు దూరమయ్యే ప్రమాదం ఉందన్నారు. కార్యక్రమంలో జాతీయ బీసీ సంక్షేమ సంఘం అధ్యక్షుడు ఎర్ర సత్యనారాయణ, రాష్ట్ర ప్రధాన కార్యదర్శి నందగోపాల్, జూనియర్ న్యాయవాదుల సంఘం అధ్యక్షుడు వంశీకృష్ణ పాల్గొన్నారు.