పశ్చిమ ఆసియాలో కొనసాగుతున్న భౌగోళిక ఉద్రిక్తతల ప్రభావంతో భారత స్టాక్ మార్కెట్ తీవ్ర ఒత్తిడిని ఎదుర్కొంటోంది. వరుసగా రెండు ట్రేడింగ్ సెషన్లలో జరిగిన భారీ అమ్మకాల కారణంగా ఈక్విటీ ఇన్వెస్టర్లు దాదాపు రూ.18.60 లక్షల కోట్లు నష్టపోయారు. మార్చి నెల మొత్తం నష్టాన్ని పరిగణనలోకి తీసుకుంటే, ఇది రూ.51 లక్షల కోట్లను దాటడం మార్కెట్లో ఉన్న అనిశ్చితిని స్పష్టంగా ప్రతిబింబిస్తోంది. BSE సెనెక్స్ వరుసగా రెండు రోజులు 4 శాతానికి పైగా పతనమవడం గమనార్హం. గత రెండు సెషన్లలో సూచీ 3,325 పాయింట్లకు పైగా లేదా 4.41 శాతం పడిపోయింది. మొత్తం మార్చి నెలలో సెన్సెక్స్ సుమారు 9,339 పాయింట్లు లేదా 11.48 శాతం క్షీణించింది. సోమవారం ట్రేడింగ్లో మాత్రమే 1,635 పాయింట్లు పడిపోయి 71,947 స్థాయిలో ముగిసింది.
మార్కెట్లో ఈ పతనానికి ప్రధాన కారణంగా పశ్చిమ ఆసియాలో కొనసాగుతున్న అమెరికా–ఇరాన్ ఘర్షణను నిపుణులు సూచిస్తున్నారు. ఈ సంఘర్షణ కారణంగా ముడి చమురు ధరలు గణనీయంగా పెరిగాయి. అంతర్జాతీయ మార్కెట్లో బ్రెంట్ క్రూడ్ ఆయిల్ ధర బ్యారెల్కు 115 డాలర్లను దాటడం ఇంధన దిగుమతులపై ఆధారపడే భారత్కు ప్రతికూల సంకేతంగా మారింది. ఇదే సమయంలో విదేశీ సంస్థాగత పెట్టుబడిదారులు (FIIలు) భారీగా నిధులను ఉపసంహరించుకోవడం మార్కెట్ను మరింత కుదిపేసింది. మార్చి నెలలోనే లక్ష కోట్ల రూపాయలకు పైగా విదేశీ పెట్టుబడులు దేశీయ ఈక్విటీ మార్కెట్ నుంచి బయటకు వెళ్లినట్లు అంచనా. ఇది పెట్టుబడిదారుల్లో రిస్క్ను తగ్గించే ధోరణి పెరిగిందని సూచిస్తోంది.
మార్కెట్ క్షీణత అన్ని రంగాలపై ప్రభావం చూపింది. ముఖ్యంగా బ్యాంకింగ్, ఫైనాన్షియల్ సర్వీసెస్, రియల్టీ, ఆటో, ఎఫ్ఎంసీజీ రంగాలు 2–4 శాతం వరకు పడిపోయాయి. 30 సెన్సెక్స్ కంపెనీలలో బజాజ్ ఫైనాన్స్, స్టేట్ బ్యాంక్ ఆఫ్ ఇండియా, యాక్సిస్ బ్యాంక్, కోటక్ మహీంద్రా బ్యాంక్ వంటి ప్రధాన షేర్లు ఎక్కువ నష్టాలను చవిచూశాయి. రెండు రోజుల వ్యవధిలోనే బీఎస్ఈలో నమోదైన కంపెనీల మొత్తం మార్కెట్ క్యాపిటలైజేషన్ రూ.18.6 లక్షల కోట్లకు పైగా తగ్గి, మొత్తం విలువ గణనీయంగా పడిపోయింది. మార్కెట్లో నమోదైన షేర్లలో అధిక భాగం నష్టాల్లో ముగియడం పెట్టుబడిదారుల నమ్మకం దెబ్బతిన్నదనే సంకేతం. ప్రస్తుతం పరిస్థితులను పరిశీలిస్తే, గ్లోబల్ అనిశ్చితి, పెరుగుతున్న చమురు ధరలు, విదేశీ పెట్టుబడుల ఉపసంహరణ వంటి అంశాలు సమీప కాలంలో మార్కెట్పై ఒత్తిడిని కొనసాగించే అవకాశం ఉందని విశ్లేషకులు భావిస్తున్నారు.
మరిన్ని బిజినెస్ వార్తల కోసం ఇక్కడ క్లిక్ చేయండి